Wednesday, March 25, 2015


ಬಾಲೆ ದಪ್ಪೆ ಬೇಲೆ ಕಂಡು
ಗಾದೆನೊಂಜಿ ಕೇನ್ದನ
ದಾನೆ ಕಾರ್ ನೀರ್ದ್ ಕುಲ್ಲುದ
ಎಂಕ್ ಒರ ಪನ್ಪನಾ?||
ಬಾಲೆದಪ್ಪೆಗ್ ಬೇಲೆ ತಪ್ಪಂದ್
ಗಾದೆ ಏಪೋಲ ಸತ್ಯೊನೇ
ಬಾಲೆದ ಚಾಕ್ರಿದೊಟ್ಟುಗೆ ಬೇಲೆ
ಇಲ್ಲ ಬೇಲೆನೇ ಯಾನೆ ಮಲ್ಪುನೆ||
ಅಲಯ ಬಾಲೆ ಬುಲಿಪು ಉಂತಾವುಜೆ
ಇ೦ಚಿಗೊರ ಬೇಗ ಬರ್ಪನ
ಅರ್ಟಿದ ಕೋಣೆಗೇನ್ ನೂರ್ಪೆ
ದಾದ ಮಲ್ಪೊಡುಂದು ಪನ್ಪನ||
ಬಾಲೆ ಬುಳ್ಪಂದೆನೇ
ಅಪ್ಪೆ ಮಿರೆನೆ ಕೊರಯಲ್
ಬಾಲೆದ ಬಂಜಿ ದಿಂಜಂತೆ
ಗಂಜಿ ತೆಲಿನೆ ಪರಯಲ್||
ತಾಟಿ ಬೊಟ್ಟೊಡಾಂಡ ರೆಡ್ಡ್ ಕೈ ಸೇರೊಡು
ಒರ್ಯನೊರಿ ತೆರಿಯೊಂದು
ಇಲ್ಲದ ಬೇಲೆ ಮಲ್ಪೊಡು
ತೆರಿಲೆ ಜನೊಕುಲೆ ಪೂರ
ಬಾಲೆದಪ್ಪೆಗ್ ಇರ್ಲ್ ಪಗೆಲ್ ಒಂಜೇನೆ
ಇಲ್ಲದುಳಯುದ ದೇವೆರಾರ್ ನಂಕ್
ಅರೆ ನಮನ್ ಪೆದ್ದಿನ ಅಪ್ಪೆನೆ||

- ವಿ.ಕೆ. ಕಡಬ
ಕಾರ್ಯಕ್ರಮ ನಿರೂಪಕರು
ರೇಡಿಯೋ ಸಾರಂಗ್ 107-8 ಎಫ್.ಎಂ.

ಬರೆತೆ ನಿನ್ನ ಪುದರ್‍ನ್
ಗಡಾಯಿ ಕಲ್ಲ್ ದ ಮಿತ್ತ್  ಡ್
ಕಮ್ಮೆನದ ಗಾಳಿ ಇಯೆ
ಸೂರ್ಯೆ ಮುರ್ಕುನ ಪೊರ್ತುಡು || 1 ||
ಅರಮನೆ ದುಳಯಿ ಕುಲ್ಲಿನ ಪೊರ್ತು
ಆ ರಾತ್ರೆದ ಕನೊಟು
ನೆಂಪೊಂಜೆ ತೆಲಿತ್ ನಲಿತ್‍ನವು
ಪೊರ್ಲುದ ಮೂಜಿ ದಿನೊಟು || 2|| 
ಪಚ್ಚೆ ಪಜಿರ್‍ದ ಉಂತಿನ ಪನಿನೀರ್
ನಿನ್ನ ಪಜ್ಜೆಗ್ ಮುತ್ತಾಂಡ್
ನಿನ್ನ ಪೊರ್ಲುದ ತೆಲಿಕೆಗ್
ಎನ್ನುಡಲ್ ಶಾಂತಿದ ಕಡಲಾಂಡ್ || 3 ||
ನಿನ್ನ ಕಣ್ಣ ದೃಷ್ಠಿ
ಸಾದಿಗ್ ಬೊಪ್ಪಾದ್ ತೊಜುಂಡು
ಬಾನದಂಚಿ ತರೆದೇರ್ ತೂಲ
ನಿನ್ನ ಪೊರ್ಲುಗು ಬೊಳ್ಳಿಲ್  ಮಿನುಕು೦ಡು|| 4||
ಒರಿತೊನುವೆ ತುಳುವ ಮಣ್ಣ್ ದ ಸಾರ
ನಿನ್ನ ಮೋಕೆ ಎನ್ನುಡಲ ಬಲೊಕು
ಹಿರಿಯಕ್ಲು ಪಂಡಿ ಪಾತೆರೊಡು
ಪುದರ್ ಕೊನಲ ಪುಟ್ಟಿ ಕುಲೊಕು || 5 ||
ಮೂಡಯಿ ಪಡ್ಡಾಯಿ, ತೆನ್ಕಾಯಿ ಬಡ್ಕಾಯಿಡ್
ನಿನ್ನ ಪುದರೇ ಒರಿಯೊಡು
ಉಡಲ್ ದಿಂಜಿಂದ್ ಇತ್ತೆ
ತಾಟಿ ಬೊಟ್ಟುದು ನಲಿಪೊಡು || 6 ||

Friday, March 20, 2015

           
ಸಂಶೋಧನೆ ವಿಮರ್ಶೆ ಚಿಂತನೆ ಪಂದ್ 
ಹಳ್ಳಿ ಪೇಟೆದಕುಲು ಕಲ್ತೆರ್ ಮಾನಾದಿಗೆದ ಬರವು 
ತೆರಿದ್ ಲಾ  ತೆರಿಯಂದಿ ಲೆಕ್ಕ ಮಲ್ತ್  ದ್ 
ಮಾರ್ಗೊಡೇ ದಕ್ಕುವೆರ್ ಕಜವು !!

ಪುಲ್ಯಕಾಂಡೆನೇ  ಒರಿದಿನ,ಕುರಿದಿನ ಕಜವುದೊಟ್ಟುಗೆ 
ವಾಕಿಂಗ್ ಪನೊಂದು ಬಂಗದ ನಡಪು 
ಮೂಂಕುಗು ಕುಟ್ಟುನ ಈ ವಾಸನೆಗ್ 
ನಾಯಿ ಪುಚ್ಚೆದ ಬುಲಿಪು !!

ಸೂರ್ಯೆ ಕಂತ್ ನಗ  
ಇಲ್ಲದುಳಯಿದ ಕಜವು ಒಟ್ಟುಗಾಪುಂಡು  
ಬೊಳ್ಪಾನಗ  ಬುಕೊರ್ಯನ ಬಿತ್ತಲ್ ಡ್  
ಎದುರುಗು ತೋಜುಂಡು  !!

ಓಣಿ ಒರಂಕುಡೆ ಒಲು ತೂಂಡಲಾ 
 ಕಜವು ಪಾಡಡೆ  ಪಂನ್ಪಿನ ಸೂಚನೆ 
ನಾಯಿ ಬೀಲ  ಡೊಂಕು ಪಂಡಿಲೆಕ್ಕ 
 ಬೋಲ್ಪನಾಗ ಕಜವುದ  ರಾಶಿ ಅಂಚನೆ  !!

ಬದಲಾವಣೆದ ಸಾದಿ  ಪತ್ತೊಡು 
ಪತ್ತ್ ಮಂದೆ  ಸೇರೊಂದು 
 ಊರು ಕೇರಿನ್  ಎಡ್ಡೇ  ದೀವೊನೋಡು 
ಕಜವು ಚೆಲ್ಲಂದಿಲೆಕ್ಕ  ತೂವೊಂದು !!

 ಕೆಬಿ ಕೊರುದು ಕೇನ್ಲೆ ಮಾನಿಲೆ 
ಮನಸ್  ಒಂತೆ  ಬದಲಾವೋಡು 
ಇಲ್ಲ ಸುತ್ತ ಮುತ್ತ ಪಚ್ಚೆ ಪಜಿರ್ ಬುಳೆದ್
  ರಂಗ್ ಡ್  ಊರೇ  ರೈಸೊಡು ...ವಿ ಕೆ ಕಡಬ